2012/09/09

غالبا لازم أكون متعاطف مع الأولتراس

غالبا لازم أكون متعاطف مع الأولتراس ودعوتهم لإلغاء ماتش السوبر حتى عودة حق شهداء بورسعيد، فده موقف السواد الأعظم من الناس ودم الشهيد أغلى من ماتش كورة.

لكن المشكلة لما يكون موقفي مش نابع من جوايا لكن باحاول أفرضه على نفسي، التدوينة ديه فيها حيرة أصلا أكثر من موقف ثابت، ويمكن أنا باكتبها عشان إحنا دلوقتي الصبح بدري ومافيش حد أرغي معاه.

بس انا مش شايف الصلة القوية بين عودة حقوق الشهداء وتوقف المباريات، خودوني علي قد عقلي وفهموني لو مش فاهم، ليه طيب ماحدش طالب بعدم إنتخاب رئيس أو برلمان مثلا حتى عودة حقوق شهداء ثورة يناير؟ أو حتى توقف صناعة الأغاني الهابطة مثلا حتى عودة حقوقهم؟ وبعدين هو ده أول ماتش يتلعب من ساعة أحداث بورسعيد، يمكن هو أول ماتش محلي لكن الفرق لعبت ماتشات أفريقية والأولتراس حضروها على ما أظن؟





أنا أصلا زهقان من الكورة وعارف إنها بقت سبوبة ومش قادر ماشكش في نوايا القائمين على الكورة في مصر السيئة، ويمكن عشان كده سهل إني أفرض على نفسي التعاطف مع الأولتراس، ويمكن أنا مقرر أأيدهم في موقفهم بفعل الدفع الذاتي، لكن إيه حايكون موقفي لو حصلت مواقف مشابهة في مواضيع تانية، ممكن ساعتها ماقدرش أفرض على نفسي نفس الموقف؟

الإستقطاب والمبالغات ساعات بتخليني مشوش الفكر ومش عارف أحدد موقفي