2015/06/16

الإنتحار كنمط داكن

 الأنماط الداكنة هي إسلوب رخيص في تصميم مواقع الإنترنت وواجهات المستخدم عشان تجبر المستخدم يعمل حاجات هو مش عايز يعملها أصلا، يعني مثلا لعبة كاندي كراش، بتعزم صحابك عالفيسبوك عشان يلعبوا غصب وإقتدار من غير ما إنت تعزمهم، وعندك كمان المواقع إللى بتحط إيميلك في قايمة بريدية أو تبيعلك حاجة ولما تيجي تقولهم أنا ماشتريتش الكلام ده يقولك البضاعة المباعة لا ترد ولا تستخدم، كل ده بيصنف تحت إسم الأنماط الداكنة، طبعا أي موقع بيحترم نفسة مش بيستعمل الأساليب البيئة ديه، ومخلينها بس لمواقع البورن والمنتديات والمتاجر الإلكترونية اللى تحت بير السلم

الإنسان برده لما بيجي الدنيا ماحدش بيسأله إنت عايز تيجي ولا لأ، وبعدين لو فكر في الإنتحار يقولوله لا يا عم، ماينفعش، الإنتحار حرام، وده بيخليني أفكر مش يمكن أصلا الدنيا ديه كلها عبارة عن كاندي كراش في فيسبوك كبير في دنيا تانية أكبر، ومش بعيد يكون اللى صممها مبرمج صيني كان شغال قبل كده في موقع بورن أو مشرف في منتدى خليجي أو هاكر روسي أو أرملة ديكتاتور نيجيري موجودين في الدنيا التانية الأكبر اللى إحنا عايشين جوا فيسبوكها