2006/10/31

مدونة حرشة عن التحرش

أنا من فترة مش كبيرة ماكنتش بصدق موضوع التحرش بالبنات و الكلام ده. و بحس إنو دلع بنات و كل واحدة فاكرة نفسها حلوة تقول إن حد عاكسها و مش عارف إيه. لحد ما لقيت ناس كتير بتأكد إلكلام ده و طبعا موضوع مالك و كل الناس إل إتكلمت بعد كده خلتني أقول أكيد يعني الناس دي كلها مش بتكذب ولا بتبالغ.
بس بعد كده لقيت كل واحد أو واحدة عنده مدونة كاتب عن نفس الموضوع أكن البلد كلها بتتحرش ببعض. طب أنا واحد عمري أكتر من ربع قرن و ومعارفي مش قليلة رغم كده ولا صحابي ولا صحاب صحابي ولا صاب صحاب صحاب صحابي حد فيهم إتحرش بواحدة قبل كده. أيوة الموضوع مهم و في بنات بتتبهدل و كل حاجة بس يا ريت الناس متبالغش في الموضوع قوي كدة و تفكر بمخها بدل ما تقلب من تحرش الولاد بالبنات لتحرش الولاد و البنات بالتدوينات.
دلوقتي طبعا كلكوا كرهتوني و مش ناويين تكملوا قراية. طب أبتدي بقى الكلام المهم بدون إزعاج.
أولا إيه إل يخلي واحد طويل عريض يبهدل نفسه عشان يعاكس واحدة أو يمسك حتة من جسمها في مترو الأنفاق. ناس حاتقول صعوبة الجواز و غلو تكاليفه. فعلا بس قلة الفلوس عمرها ما كانت مبرر للسرقة, أيوه ممكن سؤ مستوى المعيشة يكون سبب لزيادة السرقات بس برضة مش مبرر ولو حد عنده ضمير مش حايسرق ولو حايموت مالجوع. ناس تقولك البنات لابسة منغير هدوم. فعلا ده مبرر ممتاز بس ده لا مؤاخزة لو كننا حيوانات مش بنعرف نتحكم في نفسنا. طب إيه إل ناقص, الضمير و العقوبة المناسبة!؟
أولا الضمير ده بيجي من كذا حاجة منها الدين. فبعد أن حولنا الدين إلى عداد بقى عادي جدا إنك تشوف واحد قاعد بيقرا قرآن في المواصلات و في نفس الوقت لو شاف واحد بيتحرش بواحدة يقولك وأنا مالي. حاجة تانية وهي الثقافة, طول عمرهم مفهميننا إن الست دي أصل كل الشرور و ربنا خلقها عشان نغطيها درءا للفتنة. أيوة الحجاب فرض بس مش عشان الست فتنة و لو إتكشفت سيهلك الكون. الحجاب فرض كما أن المغرب ثلاث ركعات و ليس أربعة و مش من المنطق إننا نتقعد نقول ليه المغرب مش أربع ركعات, يمكن عشان الناس بتحب تقييل ساعة المغربية! و ممكن تلاقي واحد يقولك أهم مواصفات شريكة حياتي إنها تكون محجبة و بتعرف تطبخ. يعني ياريت تبقي خادمة جيدة أمتلكها دون أن يراها أحد. ما هذه البلاهة التي جعلتنا نختزل إنسان في هذه الصوره لحد ما واحد شيخ عايش في أستراليا شبهها بحتة لحمة مكشوفة. طبعا أنا مش حتكلم على الأدب و التربية عشان دي حاجات بطلت من زمااان.
تاني حاجة - ثواني هوه لسه في حد مكممل قراية!؟ - ال هية العقوبة المناسبة. يعني ماينفعش إن لو واحد إغتصب واحدة تبقى عقوبته إنه يتجوزها و بعدين نقول للناس بلاش تغتصبوا البنات. و ماينفعش إن لو واحد باس مراته أو بنته في الشارع يقوللك فعل فاضح في الطريق العام و لو واحد قففش في واحدة أو عاكسها بكلمتين يبقي بييس يا مان دمه خفيف جدا! و بيني و بينكو أنا شايف إن الهدف الأساسي من الحملة لو عايزين تعملوها حملة إن مجلس الشعب يناقش قانون مناسب لهذا الفعل, وأعتقد لو بقى فيها غرامة و فلوس بتتدفع, الناس حتلزم حدودها زي مالغرامة خلتهم يربطوا حاجة غبية زي الحزام في العربيات و ياريت مايبقاش قانون زينة مابيتنفزش.
طب فضل بقى البنات. أولا بلاش الموضوع يقلب بهبل من نوق إبر التريكو و شتيمة في كل صنف الولاد و الكلام ده عشان نتيجته عكسية و الناس حتفقد إهتمامها. تاني حاجة لو حد عملك حاجة متؤعديش ساكتة لازم تتكلمي بصوت عالي و تهزئيه. أصلك لو سكتتي أولا حايفتكرك مبسوطة أو على الأقل خايفة منه و الناس مش حتتحرك على أساس إن صاحبة الشأن معملتش حاجة يبقى إحنا مالنا.
صحيح قبل مانشططب. في ناس بتقول أحسن حل إن الحريم تؤعد في البيت و ماتنزلش الشارع منغير محرم. حاسيبكوا تردوا على الكلام ده عشان مش طالبة حرقة دم.

بي إس
ياريت بعد ما تخلص قراية تروح لأخر الحارة عشان فيه مقالة هناك كويسة و لازم تئراها

بي إس تو
للناس التى لا تتحدث المصرية بطلاقة
قراية = إراية = قرأة
قففش = حاول الإمساك بها أو ببعض منها بإحكام
تهزئيه = تمرمطيه = تمسحي بكرامته الأرض
تؤعد = تقعد = تجلس
لمزيد من المعلومات يرجى مراجعة قاموس الشباب المصري

2006/10/24

العشرة المبشرون بالبوبز

قامت هيئة التحكيم الخاصة بمسابقة دويتشه فيله لإختيار أفضل المدونات لعام 2006 بإختيار عشرة مدونات من أجل الدخول في التصفية النهائية للمدونات الناطقة باللغة العربية. و يمكنك أن تري قائمة بالمدونات المرشحة هنا. والقائمة تضم مدونات مثل مابدالي لعمرو عزت و جار القمر لهيثم و مدونة نورا يونس و أخرين لا أعرفهم و إن كنت أعتقد أنها فرصة مناسبة للتعرف على مدوناتهم و خاصة أنني أجهل الكثير من المدونات من خارج القطر المصري.
بالمناسبة فإن مدونتي الموقرة قد حققت ما يشبه صفر المونديال في هذه السابقة و بالتالي فإنني لا أستبعد أن يقوم مجلس الشعب بعمل إستجواب للعبد لله للتحقيق في الأسباب الحقيقية للخروج من المسابقة.

2006/10/19

جوليا بطرس و واحد إسمه محمد

جوليا بطرس, كما هو واضح من إسمها فهي غير مسلمة, ولكن إختلافها في الدين مع حزب الله لم يمنعها من غناء كلمات مستوحاة من خطابات السيد حسن نصرالله أثنا العدوان الإسرائيلي على لبنان و مقاومة حزب الله له. وهي نوع من التحية لمقاومة حزب الله و إنتصارها. وجوليا تمتهن الغناء و الموسيقي أو ما يسميه الفقهاء بالمعازف و يجتمعوا على يذهبوا إلى تحريمه و إعتباره لهوا.
في المقابل هناك مدون إسمه محمد, و كما هو واضح من إسمه فإنه مسلم, لكن إختلافه في المذهب مع حزب الله جعله مثله مثل عشرات المدونين الأخرين أن يخصصوا مدوناتهم أثنا الحرب للهجوم على حزب الله و الشيعة ووصفهم بالعمالة للصهيونية العالمية و الإمبريالية الغربية و أنهم يسيروا حسب مخططات الفرس و المجوس و الروم و الهكسوس, ولن أذيع سرا لو قلت لكم أنني كنت أحب زيارة مدونته كنوع من الترفيه فمقالاته مسلية أكتر من ربع كيلو فول سوداني. و هناك أيضا من فضل إدعاء صوت العقل و إتهام الحزب بالتهور حين أسر الجنديين الإسرائيليين و الغريب أنهم أنفسهم لم يتهموا حماس على سبيل المثال بالتهور حين قامت بنفس العمل قبل ذلك.
يبدو أن عبارة الشيخ محمد عبده عن الغرب "لقد وجدت هناك مسلمين بلا إسلام، ووجدت هنا إسلامًا بلا مسلمين" تنطبق فعلا على واقعنا حين حولنا الإسلام إلى عداد و تكفير و تقوقعنا على أنفسنا و أهملنا روح هذا الدين القيم و جزورة التي زرعها أشرف المرسلين صلى الله عليه و على آله و سلم.

2006/10/17

عائشة و النقاب و نقد الذات

من الطبيعي أن يختلف الكثيرون مع ما نشرته جريدة الغد حول أسوأ عشر شخصيات في التاريخ الإسلامي و تضمن القائمة لأسماء مثل عائشة و عثمان و عمرو بن العاص لما لهم من فضل مذكور في كتب الأحاديث أو حتى لإرتباطهم بفترة زمنية و هي ظهور اللإسلام و ما لها من مكانة لدينا. أنا حاولت أن أبحث عن المقالة على النت بعد أن قرأت الخبر في موقع العربية لكن بلا جدوى فأنا غير متابع لهذه الجريدة و أحسها في كثير من الأحيان تبحث عن الإثارة فقط. لكن لماذا لا نتقبل أي إنتقاد للصحابة أو للشخصيات التاريخية حتى في تاريخنا المعاصر و نصر أن نصور أي شخصية من الماضي كأنها ملاك يمشي على الأرض. حتى الشخصيات السياسية و الفنانين الراحلين!؟ ما هي تلك القداسة التي نلبسها للماضي و كأن البشر لم يكونوا بشرا مثلنا في السابق!؟
لماذا ليس من حق أحد أن يوجه إنتقادات لأحد من الصحابة و هم أنفسهم كانوا ينتقدوا بل و يقاتلوا بعضهم البعض. نعم عائشة كانت زوجة الرسول صلى الله عليه و آله و سلم لكن هذا ليس مبرر لعصمتها فزوجتا نوح و لوط كانتا كافرتين. فالنسب أو المصاهرة ليسا أسبابا كافية لإنتقال العصمة لهما. نعم قد يكون الكاتب مبالغا حين إعتبرها هي و عثمان و أخرين ضمن أسوأ عشرة أو ألف أو حتى مليار شخصية في التاريخ الإسلامي لكنه من حقه أن يقول ما يشاء و من حقنا الرد عليه بعيدا عن السب و التكفير و محاكم التفتيش. والأحداث التاريخية مثل حرب الجمل و ما أدت إليه من موت لأعداد كبيرة من المسلمين و توريث معاوية الملك لإبنة يزيد في سابقة تعد الأولى من نوعها جديرة بالإنتقاد لما لها من أثار سلبية مستمرة علينا إلى الأن.
و كلنا يذكر كيف قامت الدنيا على أسامة أنور عكاشة حين إنتقد عمرو بن العاص و كيف أن إتهامات الكفر و الزندقة و العمالة معدة مسبقا لكل من تسول له نفسه لإنتقاد أشخاص أو أحداث من الماضي.
أنا أذكر أيضا أننا درسنا في الصف الخامس الإبتدائي كتابا عن الصحابي الجليل إبي ذر الغفاري و بالتالى كان من الطبيعي أن يتضمن الكتاب بعض الإنتقادات لنظام الحكم السائد في عهد عثمان بن عفان و إنتقاد أبو ذر المستمر له حتى نفاه في الصحراء ليموت هناك. و طبعا كما هو متوقع كانت تلك أخر سنة يقرر فيها هذا الكتاب على الطلبة و كانت تلك المرة الوحيدة التى نرى فيها الصحابة كبشر حقيقيين و ليسوا ملائكة أو رسلا معصومين.
ثم جاء بعد ذلك إنتقاد الدكتورة سعاد صالح للنقاب ليثير زوبعة أخرى من الدعاوى القضائية و التكفير. هل النقاب ضرورة من ضرورات الدين!؟ أنا أتفق معها في إعتبارة موروث قبلي و عادات موجودة في بعض الأماكن من العالم الإسلامي و تم إدخالها في الدين بعد ذلك حين إحتكر هذا الجزء من العالم الإسلام لصالحة. و كلام سعاد صالح مرتبط بكلام الوزير البريطاني السابق جاك سترو حول نفس الموضوع.
أعتقد أنه يجب علينا أن نكف عن إعتبار أنفسنا على صواب و كل من يخالفنا هالك في النار. فمع إنشار وسائل الإتصال المخلفة في عصرنا الحالي أصبح من الصعب علينا النقوقع على أنفسنا و إعتبار نفسنا فوق مستوى النقد من الخارج أو حتى الداخل.

2006/10/11

إستفتاء رمضاني

في رمضان هل...
تصلي جميع الصلوات الخمس في المسجد؟
تصلي الراويح بالمسجد لكن ليس جميع الصلوات الخمس؟
تصلي التراويج و جميع الصلوات الخمس بالمسجد؟

إضغط هنا للمشاركة في الإستفتاء

2006/10/02

المسيحيين لازم يصوموا في رمضان بالعافية

ده إستفتاء عملاه قناة العربية في موقعها
من الواضح أن معظم المصوتين ضد مجاهرة غير المسلميين بالإفطار في رمضان
يعني من الأخر المطلوب منهم إنهم يصوموا في رمضان زيينا بالعافية
طب معلش بقى أنا مظنش إنى عمري فكرت ماكولش سندوتش لحمة أو مشربش شاي بحليب أثناء صيام المسيحيين مثلا
ليه بقى المطلوب منهم إنهم يصوموا بالعافية عشان خاطرنا!؟