2006/10/31

مدونة حرشة عن التحرش

أنا من فترة مش كبيرة ماكنتش بصدق موضوع التحرش بالبنات و الكلام ده. و بحس إنو دلع بنات و كل واحدة فاكرة نفسها حلوة تقول إن حد عاكسها و مش عارف إيه. لحد ما لقيت ناس كتير بتأكد إلكلام ده و طبعا موضوع مالك و كل الناس إل إتكلمت بعد كده خلتني أقول أكيد يعني الناس دي كلها مش بتكذب ولا بتبالغ.
بس بعد كده لقيت كل واحد أو واحدة عنده مدونة كاتب عن نفس الموضوع أكن البلد كلها بتتحرش ببعض. طب أنا واحد عمري أكتر من ربع قرن و ومعارفي مش قليلة رغم كده ولا صحابي ولا صحاب صحابي ولا صاب صحاب صحاب صحابي حد فيهم إتحرش بواحدة قبل كده. أيوة الموضوع مهم و في بنات بتتبهدل و كل حاجة بس يا ريت الناس متبالغش في الموضوع قوي كدة و تفكر بمخها بدل ما تقلب من تحرش الولاد بالبنات لتحرش الولاد و البنات بالتدوينات.
دلوقتي طبعا كلكوا كرهتوني و مش ناويين تكملوا قراية. طب أبتدي بقى الكلام المهم بدون إزعاج.
أولا إيه إل يخلي واحد طويل عريض يبهدل نفسه عشان يعاكس واحدة أو يمسك حتة من جسمها في مترو الأنفاق. ناس حاتقول صعوبة الجواز و غلو تكاليفه. فعلا بس قلة الفلوس عمرها ما كانت مبرر للسرقة, أيوه ممكن سؤ مستوى المعيشة يكون سبب لزيادة السرقات بس برضة مش مبرر ولو حد عنده ضمير مش حايسرق ولو حايموت مالجوع. ناس تقولك البنات لابسة منغير هدوم. فعلا ده مبرر ممتاز بس ده لا مؤاخزة لو كننا حيوانات مش بنعرف نتحكم في نفسنا. طب إيه إل ناقص, الضمير و العقوبة المناسبة!؟
أولا الضمير ده بيجي من كذا حاجة منها الدين. فبعد أن حولنا الدين إلى عداد بقى عادي جدا إنك تشوف واحد قاعد بيقرا قرآن في المواصلات و في نفس الوقت لو شاف واحد بيتحرش بواحدة يقولك وأنا مالي. حاجة تانية وهي الثقافة, طول عمرهم مفهميننا إن الست دي أصل كل الشرور و ربنا خلقها عشان نغطيها درءا للفتنة. أيوة الحجاب فرض بس مش عشان الست فتنة و لو إتكشفت سيهلك الكون. الحجاب فرض كما أن المغرب ثلاث ركعات و ليس أربعة و مش من المنطق إننا نتقعد نقول ليه المغرب مش أربع ركعات, يمكن عشان الناس بتحب تقييل ساعة المغربية! و ممكن تلاقي واحد يقولك أهم مواصفات شريكة حياتي إنها تكون محجبة و بتعرف تطبخ. يعني ياريت تبقي خادمة جيدة أمتلكها دون أن يراها أحد. ما هذه البلاهة التي جعلتنا نختزل إنسان في هذه الصوره لحد ما واحد شيخ عايش في أستراليا شبهها بحتة لحمة مكشوفة. طبعا أنا مش حتكلم على الأدب و التربية عشان دي حاجات بطلت من زمااان.
تاني حاجة - ثواني هوه لسه في حد مكممل قراية!؟ - ال هية العقوبة المناسبة. يعني ماينفعش إن لو واحد إغتصب واحدة تبقى عقوبته إنه يتجوزها و بعدين نقول للناس بلاش تغتصبوا البنات. و ماينفعش إن لو واحد باس مراته أو بنته في الشارع يقوللك فعل فاضح في الطريق العام و لو واحد قففش في واحدة أو عاكسها بكلمتين يبقي بييس يا مان دمه خفيف جدا! و بيني و بينكو أنا شايف إن الهدف الأساسي من الحملة لو عايزين تعملوها حملة إن مجلس الشعب يناقش قانون مناسب لهذا الفعل, وأعتقد لو بقى فيها غرامة و فلوس بتتدفع, الناس حتلزم حدودها زي مالغرامة خلتهم يربطوا حاجة غبية زي الحزام في العربيات و ياريت مايبقاش قانون زينة مابيتنفزش.
طب فضل بقى البنات. أولا بلاش الموضوع يقلب بهبل من نوق إبر التريكو و شتيمة في كل صنف الولاد و الكلام ده عشان نتيجته عكسية و الناس حتفقد إهتمامها. تاني حاجة لو حد عملك حاجة متؤعديش ساكتة لازم تتكلمي بصوت عالي و تهزئيه. أصلك لو سكتتي أولا حايفتكرك مبسوطة أو على الأقل خايفة منه و الناس مش حتتحرك على أساس إن صاحبة الشأن معملتش حاجة يبقى إحنا مالنا.
صحيح قبل مانشططب. في ناس بتقول أحسن حل إن الحريم تؤعد في البيت و ماتنزلش الشارع منغير محرم. حاسيبكوا تردوا على الكلام ده عشان مش طالبة حرقة دم.

بي إس
ياريت بعد ما تخلص قراية تروح لأخر الحارة عشان فيه مقالة هناك كويسة و لازم تئراها

بي إس تو
للناس التى لا تتحدث المصرية بطلاقة
قراية = إراية = قرأة
قففش = حاول الإمساك بها أو ببعض منها بإحكام
تهزئيه = تمرمطيه = تمسحي بكرامته الأرض
تؤعد = تقعد = تجلس
لمزيد من المعلومات يرجى مراجعة قاموس الشباب المصري

هناك 11 تعليقًا:

غير معرف يقول...

hi, i think u are speaking about something else, poorniss is not a reason to make this in the street with the girl , and if only one girl is toucht it is not to make it like a small accident, we are humenbeen not animals that is all, poor country they dont do such thing
thank u
nagdi

Xylo يقول...

بوئين 100 100 (لمن لا يتكلم المصرية بطلاقة، يعنى كلام قشطة و اخر فل)
عارف ليه انت لا تعرف احد من اصحابك قفش فى واحدة ؟؟ علشان الناس الى بتقفش دى نوع تانى من الناس، اقرب منهم للحيوانات.
كنتيجة لعملى، ارى من هؤلاء الناس الكثير، بجد، لا يسعك الا انك تحاول تسمه او تخنقه، كائن هلامى، دائماً مبرشم، و الوشم روتينى، اى يجب ان ترى اشكال و انواع من الوشم مثل بحبك يا منى و امى و بعض المثقفين بيحط نجمة داود او صليب معقوف (بتاع هتلر).
دول ناس مش فارق معاهم اى حاجة. مفيش حاجة اسمها ضمير، دين، نخوة... الكلام ده مش فى قاموسهم.
اكيد فى قانون يمنع التحرش بالبنات و قد يكون (لو كان موجود) من ايام الأستعمار بس المشكلة مين حينفذه ؟؟ مصر فيا مليون قانون، نادراً ما ينفذ منهم اى قانون.
مثلاً من سنة 1945 ممنوع سير عربات الكارو فى الشارع الأسفلت!!!!
لو كان فى قانون، مكنش حد حايكسر اشارة او يمشى فى الرونج. بس هنا فى ام الدنيا، هيص، ماحدش حيقولك كخ، كدة عيب، و لو حد قالك كدة، ابجة 10 جنيه و حيسكت !!!
انا عاوز اتجوز واحدة محجبة و ياريت بتعرف تطبخ بش مش علشان هى كدة شغالة ذى ما بتقول انما علشان بتكون بتسمع كلام ربنا.
ارجوا من الناس انهم لا يبالغوا، و كل واحد يقول الى شافه بموضوعية و امانة، و لايكون الموضوع مادة خصبة للخيال او البالغة علشان انا اليومين اللى فاتو دول، حسيت ان كل واحدة قد تم التحرش بيها 17 مرة لحد الآن !!

wanna b a bride يقول...

على فكرة آراءك بتعجبني جدا

دماغك حلوة و بتفكر كويس

تعالى باه شوف في المدونة عندي بسأل سؤال برئ هو انتوا يا شباب بتبصوا لأي بنت على انها جسد ولو جات فرصة بعيد عن عيون الناس ممكن تتحرشوا؟

تخيل المعظم قاللي آه

مش عارفه ايه اللي بيحصل بالظبط؟

Unknown يقول...

@Nagdi, It's either me who sucks in English, or you are using some weird language that looks like English.

@Xylo, "انا عاوز اتجوز واحدة محجبة و ياريت بتعرف تطبخ بش مش علشان هى كدة شغالة ذى ما بتقول انما علشان بتكون بتسمع كلام ربنا."
إنت مافهمتش قصدي. أنا إل باقولة إن مش ممكن يكون واحد أهم نقطة في إل عايز يجوزها إنها محجبة أو بتطبخ. أكن مش فارقة معاه شخصيتها و سين و صاد سيان بالنسبة له طالما أن كلتاهما محجبات و يجدن الطهو

@Wanna be Bride, بعيد عن الدين والأدب و الأخلاق فين الكرامة يعني إيه واحد أقصى طموحة إنه يمسك واحدة رغما عن إرادتها.

Mongey يقول...

كلامك منطقي جدا تقريبا اول واحد يلفت نظري و يخليني عايز اعلق
اصلي شوفت ان الباقي كله بيدور في نفس
النسق و الاطار حتي الي تعب نفسه و قعد يتكلم عن تعريف التحرش و تعريف الاغتصاب
بس في نقطة معينة هي ان الموضوع ممكن يكون حصل فيه مبالغة نوعا ما يعني انا معرفش
و بعدين حتة انك متعرفش حد من المتحرشين
انا باشوف انها نوعا ما طبيعيا لان اغلبية العالم ديه بعيد عن انه بقي ذئاب وبقر وحيوانات و كده
انا باشوف انهممن الطبقة الفقيرة
اوي يعني الي بشكل ما فعلا مبيعرفوش شي عن الدين و الاخلاق
يعني
بس

sara يقول...

اولا السلام عليكم
تاني حاجة.. علي انك عمرك ماسمعت عن التحرش في الشوارع... لا علي فكرة ده ظاهرة منتشرة جداً ياطارق ... تقريباً بتكسفوا يحكولك .. لاني لسة ماقبلتش واحدة في مصر لم يتحرش بها احد ... سواء في الشارع او المواصلات العامة

غير معرف يقول...

السلام عليكم ورحمه الله وبركاته
انا قريت الكلام الى انت كاتبه يا اخ طارق وفعلا رايك عجبنى جدا بس فى حاجه عايزه اعلق عليها وهى فعلا انالاحظتها ان الى بيعملوا كده هما المعظم من اطفال الشوراع الى هما تقريبا معندهمش فكره عن اى حاجه لا اخلاق ولادين ولاقيم ولا اى حاجه يعنى ببساطه عايشين كده وخلاص (اقرب للحيوانات) وطبعا مع العلم ان الى هما فيه ده مش بايدهم هو تقصير من الحكومه ومن الشعب واكيد تقصير منهم هما كمان بس الى عايزه اقوله ان لو بصينا على اى مشكله موجوده عندنا دلوقتى فى البلد هنلاقى ان السبب فيها مشكله تانيه اكبر منها يعنى احنا تقريبا بندور فى حلقه مفرغه ازاى نحل كل المشاكل دى باه ربنا يرحمنه برحمته ويحفظنا من كل سوء

أكتب لأعبر عن حقوقي يقول...

اصلا الموضوع اللي بتتكلم فيه يا استاذ دا واضح وموجود وبكثرة ومش صعوبة الجواز هيا المبرر ولا تكاليف ولا اي نيلة

بس الانحطاط وقلة الادب هيا المبرر ومش ضروري البنت تكون لابسا من غير هدوم عشان تتعاكس بالعكس حتى البنت اللي ماشية محترمة بيعاكسوها ودا في خلل في مخوهم عشان متخلفين وبيحسبو المعاكسة مرجلة وفخر ليهم مش قلة ادب وتخلف

ودا طبعا راجع لطبيعة المعيشة والعائلة وراجع الاهل ازاي ربو اولادهم

وما بسمحلكش تقول ان البنات هما السبب لما الواحد متربي وخلوق ما بيعملش كدا لو كانت البنت لابسا من غير هدوم حتى

بس طبعا البطالة والجهل والتخلف مو الجهل عدم العلم لا الجهل عدم الوعي لانو عمر ما كان الجهل بالاخلاق والادب من قلة العلم بس من قلة الوعي

وكمان الدين مالوش اي مبرر في دا يعني بحدا بتقول المسيحيين بقى كلهم بيتحرشو والمسلمين لا

والعكس بقى هو اللي صاير عشان في شيء اسمو انسانة بس دا احنا ما بنتعلموشي

وقصة التحرش دي عمرها ما حتنحل إلا لما التخلف يتوقف

احمد وفيق يقول...

موضوع مهم فعلا ومعرفش ازاي الشباب دول بيقدروا يعملوا كده
ياريت حضرتك تزور مدونتي وتفيدني برايك
mypenwithme.blogspot.com

المثالي جروب يقول...


شركة تسليك مجاري بالدمام
شركة تسليك مجاري بالجبيل
شركة تسليك مجاري بالقطيف

شركة تنظيف منازل بالقطيف
شركة تنظيف بالقطيف
شركة تنظيف بالخبر
شركة تنظيف بالدمام
شركة تنظيف بالاحساء

elmnzel يقول...





شركة نقل عفش بالطائف
شركة المنزل هى شركة نقل عفش بالطائف لدينا العمالة المدربة التى تستخدم اجود انواع الاوناش والروافع التى تقى العفش والاثاث من الكسور والخدوش المحتملة عند اهمال نقل العفش كما اننا نقوم بتفكيك العفش بالطائف واعدة تركيبه حتى يسهل حمله ونقوم بتغليف العفش بأكياس بلاستيكية والكرتون المقوى لحماية العفش من الخدش والاضرار وللحفاظ على قيمته ونقدم خدمات نقل العفش بالطائف بأرخص الاسعار .
نقل اثاث بالطائف
http://elmnzel.com/moving-furniture-taif/