2012/06/03

فخ المجلس الرئاسي

كواحد مقاطع إنتخابات الإعادة لعدم إقتناعي بأي من المرشحين، ولإعتقادي إننا من أول يوم مكانش المفروض نسمح للمجلس العسكري إنه يحط قوانين وإعلان دستوري وكان المفرض نجيب مجلس رئاسي على رأي البرادعي، إل ساعات كتير باعترض على مواقفه بس الزمن بيثبت إن معظم توقعاته وأراؤه بتكون صح، المفروض بعد كل ده أكون موافق على فكرة المجلس الرئاسي عشان نخلص من كابوس شفيق وعك المجلس العسكري وكل البلاوي السودة ديه.

لكن الحقيقة أنا معترض بقى على فكرة المجلس الرئاسي دلوقتي بالذات

حاول تحط نفسك مكان الإخوان لدقائق، مش فكرة مجلس رئاسي دلوقتي معناها إن الأطراف التانية بتقول لو إحنا إتقلشنا من سباق الرئاسة ومش فاضل غير الإخوان ضد شفيق، خلينا نضرب كرسي في الكلوب ونرجع للمربع صفر وأهو نطلع بمقعد في مجلس رئاسي أحسن من إن الإخوان تستفردوا بالكيكة كلها.

عارف إنك حاتقوللي، مش كده أحسن من لما نكمل إنتخابات وشفيق يكسب بالتزوير أو مرسي يكسب بس المجلس ينزع منه كل الصلاحيات؟ كلامك سليم، بس برده حط نفسك مكان الإخوان، وقدر مخاوفهم، وحاول تشوف حل يرضي جميع الأطراف بدل ما تخونهم وتفسر رفضهم للمجلس الرئاسي إنه مجرد تغليب لمصالحهم الشخصية وكل الكلام ده.

خلي بالك إن فيه جرح قديم بين الثوار والإخوان ساعة أحداث محمد محمود، وبرده تم طرح فكرة مجلس رئاسي ساعتها وهما خافوا يكون ده ملعوب لتهميش دور البرلمان، أو خلق قوة موازية تقف قصاده. مش باقول مين كان صح ومين كان غلط ساعتها، ساعتها أنا وكلنا لومنا الإخوان، بس أنا برده باحط الموقف ده عشان نحاول نفهم نفسية الطرف الثاني ونبرر أو حتى نتفهم مخاوفه وشكوكه دلوقتي.

وبعدين فاكس إخوان، عندك ناس كتير من إل نزلت إنتخبت ممكن تاخد موضوع المجلس الرئاسي ده على صدرها وتقفش وتحس إنك بتتف على صوتهم ووقفتهم في الشمس يوم الإنتخابات، صحيح منهم إل بادعي عليه في كل صلاة عشان إنتخب شفيق، بس أدي الله وأدي حكمته.

كل إل باقوله، خلينا نشوف حلول وسط ترضي جميع الأطراف، حتى لو كانت حلول مجنونة.
  • تعيين مجلس رئاسي لفترة شهر أو شهرين مسؤليته إجراء الإنتخابات فقط وتسليم السلطة، وياسلام لو يعزل يطبق قانون العزل ساعتها على شفيق ونكمل الإعادة بين مرسي وحمدين
  • عزل شعبي لشفيق، نطبع ورق فيه إسم مرسي وحمدين أو أي مرشحين تانيين ونوزعه على الناخبين عشان يحطوه في الصناديق، ولازم الموضوع ده يكون على مستوى الجمهورية كلها وبالتالي تبقى الإنتخابات فعليا مافيهاش شفيق، وممكن نعمل فرز موازي وكل حاجة، مجنون أنا؟
  • غلب حماري، قولوا إنتوا حلول تانية