2008/08/31

رمضان جانا ... ممم ... و فرحنابه

رمضان جانا ... أهلا رمضان
فعلا رمضان شهر له مذاق مختلف
خاصه هنا في مصر
لكن في أخر سنتين مبقتش بحب رمضان قوي زي زمان
زمان كنت بحب ساعت الفطار لما جدي كان بيجي يفطر معانا
و بعد الفطار كوباية الشاي كانت مقدسة رغم إنه كان دايما يقول إن الشاي بعد الأكل على طول مش بيخلى الجسم يستفيد من الحديد الموجود في الأكل
وكان عاده بعد الفطار يقعد يحكيلنا حكايات سمعنا معظمها قبل كده كذا مرة
لكن برضه كنت بحب أسمعها تاني
ساعات كتير كنت بحس إنه واحد صاحبي و هوه كمان ساعات كتير كان بيعتبرني قده
أنا فاكر حتى إنه أيام ما كان سني كام سنه كده بيتعدوا على الصوابع كان بيحكيلي قصص تاريخية
و إيه السبب إل قامت عشانه الحرب العالمية الأولى
لدرجة إن أهلي بيحكولي إنهم كان زمان بيفكروا يودوني المدرسة الألماني و إني ساعتها قلتلهم مش عايز أبقى مع هتلر في الفصل
هوه كمان كان بيحب اللغات و كتير كان بيحب يشوف أصل كلمات معينه جه منين
و إزاي إن الكلمه الفلانية في الإنجليزي أصلها كذا في اللاتيني
و كلمة تانيه عامية مصرية أصلها أجنبي
و ساعة لما كان بيروّح كنت بزعل قوي و بستنى تاني يوم المغرب عشان يجيلنا تاني
و أدي سنة جديدة عدت بسرعة و بكرة إنشأالله أول يوم رمضان كل سنة و إنتم طيبين
لكن جدي خلاص مبقاش بيجي يفطر معانا زي زمان



هناك 10 تعليقات:

AUCWORKERS يقول...

كل سنه ونت طيب ياولد
تعيش وتفتكر

Unknown يقول...

و إنت طيب يا مالك

Gihan يقول...

Yeaaah, el post dah begad assar feeya,ennahra kan awel Ramadan ye3addy 3aleena men 3'eer geddoh, wa7ashny awy, w begad el fetar kan ka2eeb awy men 3'eeroh, lamma sada2at el 3esha eddanet 3ashan anzel assaly w ad3eeloh

Allah yer7amak ya geddoh :(

Unknown يقول...

تعيشي و تفتكري يا جي جو

دعـاء عـلى يقول...

حلوه مش عايز أبقى مع هتلر فى الفصل دى (:
البركه فيك بقه تبقى تعد تحكى للأجيال الجايه
كل سنه و انت طيب و رمضان كريم عليك (:

Unknown يقول...

كل سنة و إنت طيبة يا دعاء و رمضان كريم

micheal يقول...

كل سنة وأنت طيب يا طاروق ورمضان كريم
تحياتي

Unknown يقول...

و إنت بالصحة و السلامة يا ميكا

Che_wildwing يقول...

كل سنة وانت طيب ياراجل ياطيب

Unknown يقول...

وإنت طيب يا شي وايلدونج