2008/11/26

عايز أعزف ميزيرلو

فرقة اللوبيا أو Black Eyed Peas عندهم أغنية كدة مزيكتها جامدة جدا إسمها Pump It.
بس العيال دول صوتهم مزعج و عشان كده عمري مركزت في المزيكا ديه قوي.
لكن من فترة كده إكتشفت نفس المزيكا في فيلم قديم إسمه Pulp Fiction.
فقولت أكيد الحكاية فيهأ سر و دورت لحد معرفت إنها لحن جريجي قديم إسمه Misirlou.
و كمان عرفت إن ميزيرلو معناها بالجريجي البنت المصرية.
و ده كان السبب إنَي نزلت الجيتار من فوق الدولاب و شيلت التراب من عليه و حاولت أعزف ميزيرلو بنت الإيه ديه بس فشلت فشل زريع.

من يومين كده كنت في محطة البنزين كان فيه واحده في العربية إل جمبي فيها حاجة كدة شدتني.
المهم إني مليت بنزين و مشيت و بعدها بربع ساعة في مكان بعيد لقيت نفس العربية و فيها نفس البنت بتركن جمبي.
قولت لنفسي لازم أقولها أي حاجة فسألتها أكتر سؤال ساذج في الدنيا.
مش إنتي كنتي في محطة بنزين من شوية؟
و إتبسطت قوي إنها ردت عليا و كمان سلمت عليا و هي ماشية.

و دلوقتي أنا عايز أشوفها صدفه تاني و ساعتها أجيب الجيتار إل معزفتش عليه غير تلت أو ألابع مرات قبل كده و أعزفلها ميزيرلو.

هناك 11 تعليقًا:

Zeinobia يقول...

مش انتى اللى كنتى فى المحطة !!
ده اللى ربنا اقدرك عليه !!

Unknown يقول...

أعمل إيه طيب
أقولها حطيتي تسعين ولا إتنين و تسعين يعني؟

محمد حمدي يقول...

بوست جميل اوى .. بحب جدا البوستات الى بتحكى مواقف حقيقيه جدا وانفعالات متضاربه ونهايات لا سعيده ولا حزينه

تحياتى لك

Unknown يقول...

شكرا يا محمد
عارف ... أنا إكتشفت إني قلما بكتب حاجات بالشكل ده ... مش عارف ليه يعني

غير معرف يقول...

يابني كنت تخليك مبدع فى كلامك يعني مثلا تقولها....: "هو النهارده ايه عشان نسيت؟"

Unknown يقول...

مية مية
أموت أنا في الإبداع

Lasto-adri *Blue* يقول...

بما ان دا اول تعليق لي ع البلوجز من ع الموبايل وكمان بالعربي، يبقي تاكد مابعملش العذاب دا الا عشان بوست يستاهل.
اول مرة اعرف انك مؤمن بالحب من أول نظرة

Unknown يقول...

بيني و بينك
أنا كمان أول مرة أعرف كده

غير معرف يقول...

انا اصلان مش مصدقة اى حاجةمن الكلام ده
اكيد ده محصلش او حصل لحد تانى حكالاك عليها
مش طرق اللى انا اعرفه ده خالص
مش ممكن

Unknown يقول...

هممم ... واضح إن إنتي متعرفينيش كويس
;)

غير معرف يقول...

اظاهر كده ;)