2009/12/17

أبوّخ إعلانات في التاريخ

فيه شوية إعلانات كده في التلفزيون ما يعدموهاش ... كمية من البواخة و الرخامة مالهاش حدود
و طبعا المركز الأول في البواخة حايروح لإعلانات الرنات و لعبة لوكسور و زوما و من على شاكلتهم ... أولا ليه البني أدم إل بيعمل الإعلان ده بيتكلم زي الجنّي إل لسه خارج من المصباح. و بعدين ليه بيقطّع في الكلام أكن عنده بوجيه بايظ و إخترع أرقام جديده زي إيتنيين بدل إتنين و تيسعا بدل تسعة.
فيه بقى الإعلانات الأحفورية بتاعت الراجل أبو دقن و صاحبة إل بيبيعوا مفارش و كبايات و حلل و مش بعيد لبسة و كلاسين ... إشتري طقم الماجيك خمس شرابات و فانلتين بنص كم و كل ده بيتسعة و تسعين جنيه. و أول عشرين متصل حياخدوا صابونة و طقم كلوتات الهنا و سوتيان هدية. إيه البيض الأومليت ده! تقولش باتفرج على قناة الموسكي تي في, ولا قناة العتبة الخضرا الفضائية.
كل ده كوم بقى و إعلانات الشيخ سيد و أحمد عبدون و محمد حسان و أمينة شلباية و الشلة العجيبة ديه. لو شوفتي حرامي الحلة ماشي على قفاكي بليل كلمي أبو السيد يفسرلك أحلامك. أما لو صاحبك نفضلك و عايزة حد يسليكي أو يحللك مشاكلك العاطفية في إطار من النيو دعويزم كلمي عبدون أو حسان. أما لو عندك نمش في لسانك من جوة أو بتطلعلك حبوب سودة في أمبوللتك و بتخلي شكلك وحش وسط صاحباتك كلمي الست شلباية تديكي وصفة مالهاش حل.
أما بقي لو صاحبك نفضلك عشان عندك حبوب سودة و نمش و بتحلمي بحرامي الحلة بالليل فلازم تتصلي بالخط الساخن و حايرد عليك عبدون و شلباية و سيد يا سايد في نفس واحد و يقولولك, إحنا الفسافس, فسفس.

هناك 3 تعليقات:

غير معرف يقول...

ههههههههههههههههههههههههه. حبوب سودا في امبولتك!!! D:

mrym يقول...

مساء الخير
بصراحة مش عارفة اقولك ايه انت حالة بقالي مده ما شفتهاش
بتقول الحاجات الصعبة والمهقدة بشكل مبسط دمه زي العسل
حقول ايه ماانت مصري ولازم دمك يكون عسل في عسل في عسل خلاص كفاية لزاق
عموما انا اتشرفت ونزلت دموعي من الضحك وانا بقرأ تعليقاتك او بمعنى اصح مقالاتك الرائعة في كل شيء
وارجو ان تتقبل نصيحتي بأن تحاول ان تكتب قصص
صدقني حتكون حكاية وتتعمل افلاكم كمان
ارجو اعتباري صديقة
انا مريم
اليمن

Tarek يقول...

مساء الفل يا مريومة,
أشكرك بالفعل على الإطراء الجميل, و لكنني لم أحاول كتابة قصص من قبل, ربما لأن عقل يمل في منتصفها, لكني دعينا نحاول يوما ما