2010/02/15

الفالنتاين المصري ... أم الأجنبي

Valentine Eggs
واحد زي حالاتي نص صاحباته ماتوا بالبلهاريسيا و النص التاني ماتوا متكرهبين أكيد مش حايهتم بالفلانطين, بس لجل حظي النكد قولت أعمل جولة في المدونات المصرية عن الفلافيلو داي ده و أكتب ملخص باللغة الإنجليزية عن عيد الحب المجيد و الناس هنا في مصر بتقول إيه بخصوصه. المهم عشان ماطولش عليكوا, تقريبا المدونين كتاباتهم كلها لم تخرج عن مجموعة ثابتة من الإسطمبات.

البنت أو الولد ال مش هاممهم: أنا صحيح عايش فراداني و مش مصاحب ولا خاطب ولا متجوز, بس ده مش معناه إني بحقد على المأنتمين, لأ, بالعكس خالص, كل ما هنالك إن الفالنتاين ده فكرة غربية إستهلاكية إمبريالية و بعدين ليه نحب في يوم واحد في السنة لما ممكن نحب طول السنة.
التحليل النفسي للحالة: نقول قصر ديل مثلا؟

البنت أو الولد إل مش هاممهم و في نفس الوقت متدينين: الفالنتين بدعة, و كل بدعة ضلالة, و كل ضلالة في النار, وللمسلم عيدان فقط, عيد الفطر و العيد الكبير, لكن الفالنتاين هو رجس من عمل الكفار و تشبه بالنساء و هو عيد نصراني يهودي علماني يدعو للفسوق و المعاصي.
التحليل النفسي: نقول برضه قصر ديل ولا إيه؟

البنت أو الولد إل مش هاممهم و في نفس الوقت مناضلين و وطنيين قوي: حب إيه بس إل عايزين يحتفلوا بيه, أنبوبة البوتاجاز شاحّة في السوق و حايشيلوا الدعم من رغيف العيش و المواصلات زحمة, حد فاضى للحب و لعب العيال ده! حب بلدك و إشتغل بإخلاص بدل ماتضيع وقتك في البنات و الكلام الفاضي ده.
التحليل النفسي: يووه بقى, هو قصر الديل ده ورانا ورانا ولا إيه؟

البنت أو الولد إل مش هاممهم و بينقطوا حب من كل ناحية: أنا السنا ديه - قال يعني مش بيعمل كده كل سنة - قررت إني أحب كل الناس حواليا, و أبعت وردة لزمايلي في المدرسة و عم جاباللا البواب و الأبلة بتاعت سنة أولى إعدادي.
التحليل النفسي: غير طبعا قصر الديل, ممكن نقول بالفم المليان, ياض إختشي على دمك و بلاش مياصة و إنت شبه تعبان البحر بالإنجليزي كده.

طب بدينكوا و أيمانكوا, لو الناس الأجانب شافوا الكلام ده حايقولوا علينا إيه, شعب بيعاني من عقد مركبة أو بعبارة أخرى
A Pervert Nation

هناك 12 تعليقًا:

ayoush يقول...

الرجاله والبنات عندهم ازدواج فى الشخصيه- بقصد المصريين- بيكونوا احساسهم حاجه ورد فعلاهم حاجه تانيه خالص- او يمكن مش بيعرفوا يحسوا اصلا

Tarek يقول...

شوفي يا أيه: أنا أخدت مادة علم نفس في ثانوية عامة و حولت جغرافيا بعد شهرين عشان مفهمتش حاجة, بس الحاجة الوحيدة إل ممكن أقولها هنا إن ديه في علم النفس بيسموها حيل دفاعية

ayoush يقول...

انا بقى مش درست علم نفس- يعنى ايه حيل دفاعيه

Tarek يقول...

7aga keda zay 2osr deel belzabt

منمناتى أنا يقول...

هاهاهاهاها- داه انا؟

سراج يقول...

مبين محروق قلبك لأنه ماشاء الله أموتهم كلهم:)
[واحد زي حالاتي نص صاحباته ماتوا بالبلهاريسيا والنص التاني ماتوا متكرهبين أكيد مش حايهتم بالفلانطين] = [البنت أو الولد ال مش هاممهم: أنا صحيح عايش فراداني و مش مصاحب ولا خاطب ولا متجوز] طبعاً مع فارق التفكير :)
اليوم قرأتك مامضمونه: أن منطقة الشرق الأوسط وشمال أفريقيا كانت الأكثر إنفاقا بمناسبة "الفلانطين" إلي معاجبك!

Tarek يقول...

سراج: إحم, ملحوظة و لا أروع, معك حق, من الواضح أنني كشخص مصري يجب ألا تخرج حتى تدونتي هده عن المجموعة السابق ذكرها من الإسطمبات

أنا ماقلت إنو ما عاجبني, بالعكس, أنا إل ما عاجبني رد الفعل تجاهه

Lasto adri *Blue* يقول...

test comment

Tarek يقول...

test response

koora يقول...

بارك الله فيك

mrym يقول...

هاي تاريك
او طارق
مساء الخير دي تاني مرة اكتب فيها رد على كلامك الجميل وايلي احيانا يخرج الواحد من المود الوحش ايلي بيكون فيه في الشغل
واسمح لي اعلق على الفلانتين داي وهو انك نسيت فئة مهمة وهي
الولد والبنت ايلي من زمان ماشافوش حب حقيقي
بيتهيألي اننا اذا لاقيناه مش مهم بقه اذا كنا نحتفل بيه مرة او مليون نسميه فلانتين داي او سلامتها ام حسن
المهم يكون حقيقي
وبمناسبة الحقيقي مش الأونطة انت عملت البيضة على شكل قلب ازاي
دس سؤال مش خباثة !
اختك مريم
اليمن

Tarek يقول...

كورا, شكرا

مريم, أنا وجدت الصورة عالنت, لم أصنع بيضة بهذا الشكل من قبل لكنها جديرة بالمحاولة