2011/06/18

هو إحنا عملنا الثورة ليه؟

لا حقيقي، أنا مش ناوي أتفلسف يعني.
عملنا الثورة عشان نشيل مبارك ونظامة؟
ماكدبش عليك، مبارك بالنسبالي قديم قدم الحياة، فهو موجود تقريبا من أول لما جيت للدنيا، وبالتالي طول عمره كان رمز لأي حاجة وسخة في الحياة. بس لعلمك مبارك يوم تمانية وعشرين يناير كان مجرد هدف ثانوي تافه، ياكش بس قنابل الغاز وعناده في خطابه بعد كده هو إل خلاني أقفش عليه أكتر.
طب إيه كان هدفي الأساسي طيب؟
موضوع خالد سعيد؟ أيوة، إفتكرت ... أنا بقالي سنين مبضون فشخ من الشرطة، يعني إيه يعني واحد يتقبض عليه ويتعزب ولا يموت زي خالد سعيد منغير تهمة ... وخالد سعيد كان القشة إل قسمت ظهر البعير ... وبعدين راحوا قطعوا الإنترنت، لا بقى ... أنا مش حاسكت تاني لتدخل أجهزة الأمن في حياتنا ... هي مش تكية أبوهم هي.
أنا أصلا كنت عايز لما أكتب حاجة في مدونتي مافكرش قبلها هل ممكن البوليس يعتقلني بسببها ولا لأ.
ونزلت عشان أقف مع العامل إل حقة مهضوم رغم إن يمكن أنا شخصيا مش متضرر زيه.
بس برده ... هي ديه كانت الهدف الوحيد؟
لأ
أنا كمان كنت مبضون من الزحمة في الشوارع، والناس إل بتستعمل كلاكس العربية عمال على بطال، والموتسيكلات إل بتعمل غرز بنت فلوطة وهي بتسوق، والعيال إل بتنده عتبة عتبة برتابة مملة في الميكروباصات، وعدم إلتزام كل واحد بدين أم الحارة المرورية بتاعته.
هايف أنا؟ برجوازي متعفن؟ أصلا إيه علاقة الكلام ده بالثورة؟
ماعرفش، بس مش قلتلك مبارك كان طول عمره رمز لأي حاجة وسخة في الحياة.
وإيه كمان؟
أنا كمان كنت مبضون من كمية الستارت أبس الإسرائيلية إل باتكعبل فيها وأنا باتمشى على الإنترنت، وباتغاظ إننا معندناش حاجة شبه كده.
و كنت عايز الضمير يبقى أقوى من القوانين، لأن أنا أصلا باتبضن من القوانين.
ونزلت كمان عشان كنت مبضون من الشيوخ إل بتحرم كل حاجة و بتفتي في كل حاجة وهما مش فاهمين حاجة.
يعني الناس مكانتش لاقية حق الدوا ولا لاقية تاكل، وأنا باتكلم في ستارت أبس و كلاكسات؟
أعمل لكم إيه، أكدب وأقول شعارات رنانة عشان ترتاحوا.
شكلي بقيت عامل زي إعلان أنا كنت جزء من النظام و مصر بتتقدم بينا التافه ده؟
لأ، ده إعلان متخلف وبيشتغلنا ... لكن أنا بجد كنت مبضون من حاجات كتير صغيرة وممكن تبان هايفة ... يمكن كمان أكتر وأهيف من إل أنا كتبته هنا ... بس هو ده أنا ... أنا شكلي نزلت الثورة لمجرد إني كنت مبضون.

عموما أنا أنصحك تقرأ كمان التدوينة ديه عشان تعادل تأثير تدوينتي البرجوازية
الفقراء أولاً يا ولاد الكلب

أسيبكم بقى عشان إخواننا الوهابيين يقولو عليا كافر و اليساريين يقولوا عليا برجوازي نخبوي عنصري.

هناك تعليق واحد:

تطبيقات يقول...

تحياتنا للشب التونسى الاصيل