2012/02/23

خالد علي، إنتي تاني؟

خالد علي


غالبا سيادتك أول لما سمعت إسم خالد علي، جه في مخك المطرب ده، صح؟

 ماتخافش، أنا كمان أول لما سمعت ناس على تويتر بتطالب بترشيح خالد علي لرئاسة الجمهورية فكرت في المغني ده، مش يعني عشان أنا واحد من الفانز بتوعه، لكن لأنها كانت أول مرة أسمع عن خالد علي التاني. رغم إني لاجئ على تويتر وساعات كنت بأحب أروح أشم شوية غاز في ميدان التحرير لكن عمري ما سمعت عنه. حتى جوجل - تقدس إسمه في السماء - لو سألته حايفكر في المغني زيه زي أمثالنا من البشر الضعفاء.

طيب، هو خالد علي محامي العمال - مش المغني - كويس ولا وحش؟ أنتخبه ولا فكني منه؟
غالبا هو راجل إبن حلال وكويس، كل الناس الكويسة على تويتر بتقول عليه كويس وبيشكروا فيه جامد ... بس على رأي المثل الطريق إلى الجحيم مفروش بالنواية الطيبة و إل يتلسع من الشربة ينفخ في الزبادي.

خالد على بالنسبالي هو قائمة الثورة مستمرة بتاعة إنتخابات الرئاسة. أيام إنخابات البرطمان صوتت للثورة مستمرة وفي الأخر أخذوا حوالي إتنين في المية من أصوات الدايرة بتاعتي، يعني بإختصار لو كنت قعدت في بيتنا قزقزت لب كان أكرملي بدل ما أضيع صوتي.
ساعتها كان ضميري ناقح عليا، وخصوصا مع الزن إن قايمة الكتلة - إختياري البديل ساعتها - ديه فلول وتبع ساويرس ومش عارف إيه، فقولت خلاص مابدهاش بقي وننتخب بضميرنا. اللطيف بقى إن الكتلة دي إل قعدوا ينتفوا في فروتها طلع منها إثنين من أكثر الناس إل بتقاوح في البرلمان دلوقتي لصالح الثورة، أبو حامد وزياد العليمي. ومافتكرش إني إتخيلت بولا واحد من بتوع الثورة مستمرة في البرلمان لحد دلوقتي.

وعشان كده مش ناوي أكرر نفس الغلطة في إنتخابات الرئاسة، وحاحاول أخلي إختياراتي أكتر برجماتية. وياريت ماسمعش تاني الكلام الرومانسي بتاع كلنا ثقة في الشعب المصري العظيم وإنه ساعة الجد حايدي صوته للأصلح ... لأن الكلام ده - على رأي إخواننا الأمريكان - كخراء الثور، وأصلا منغير زعل، إنتخابات مجلس الشعب أثبتت إن نسبة كبيرة من الشعب ده غالبا بتختار إختيارات بنت قحبة ماسوشية، وبالتالي بلاش رومانسية وحيا أبوكم وحاولوا تلعبوا بذكاء. ومحدش يسألني إزاي.

الشعب العظيم بتاعكم ده إنتخب السلفيين والإخوان، ودلوقتي بيطالبوا بحجب المواقع الإباحية وهو بيسقفلهم وفرحان ... أدي دقني أهيه إنه ساعة لما تتحجب المواقع ديه، نفس الشعب العظيم حاتلاقيه سايب شغلة ومشاغلة وداير يدور على بروكسيهات لكسر الحجب، مش بقول لكم ماسوشية. نفس إل إختار الفستان البمبي في رمضان ودخل فيلم شارع الهرم في العيد هو إل إنتخب الإخوان والسلفيين عشان ينصر الدين ... مش مصدقني؟ طيب روح شوف الصورة ديه وقولي رأيك لما ترجع.

لحد دلوقتي أنا أصلا مش عارف حانتخب مين. يمكن ربنا ينفغ في صورة خالد علي على موعد الإنتخابات وأغير رأيي، بس لو ده محصلش أكيد مش حاضيع صوتي حاشوف حد فرصه أقوي ... ولا أقولك، مش ممكن البرلمان يضحك على كل المرشحين ويعمل دستور صلاحيات الرئيس فيه زي صلاحيات الولية ملكة إنجلترا، ويبقوا كلهم لبسوا الصابونة ... ولا أقول لكم، ماتيجوا ننتخب بثينة    كامل، ست بنت حلال ومحترمة وثورية و أهه نبقى عملنا حاجة جديدة وإنتخبنا ست في رئاسة الجمهورية وبالمرة نرخم على السلفيين.

هناك 13 تعليقًا:

محمد عبد الغفار يقول...

انا مجاش فى بالى خالد على ده انما لما عملت سيرش على النت عشان اعرف مين هو خالد على المرشح للرئاسيه كل الأجابات طلعت عن المطرب عدا اجابه واحده

Tarek Amr يقول...

شوفت جوجل برده إتلخبط زيي ... بس سيبك إنت، أنا كانت واحشاني مدونتك ومش عارف كانت تايهة فين، كويس إني لاقيتها وضفتها للمدعو جوحل ريدر، منه لله التويتر بعدنا عن قرآة مدوناتنا المفضلة بزحمته

zeyseeker يقول...

طيب أحنا عواجيز و عارفين خالد على المغنى... جيل الشباب ذنبه أيه ! :)
عايز أسألك أنت فاكر أى أغنية لخــالد على ؟ طيب فاكر أى حاجة شارك فيها بالتمثيل ؟ :)

Mohamed ElGohary يقول...

أنا بقة فيه واحد كان جنبي في الفصل اسمه خالد علي :D

Tarek Amr يقول...

نحب نشكر الكابتن جوهري على الإضافة القيمة

Tarek Amr يقول...

زي، أنا الصراحة مش فاكرله غير أغنية في كل مكان بتطارديني .. هو مثل؟

ramy1313 يقول...

هو انا بس مختلف معاك فى انتخابات مجلس الشعب وخصوصا فى نظام القائمة حتى لو التمثيل ضعيف فهما عملوا شغل حلو المشكله بقا لو كانت كلها فردى .. إهى انتخابات الرئاسة عامله زى الفردى كده المشكلة فى ترشيح خالد على أنه كويس بس حنبقى فى مشكلة نرشح الكويس وخلاص زى ما ناس بتقول ولا نختار واحد قريب منا وفرص نجاحه اكبر عشان نقلل فرص اللى مش عجبانا اصلا مشكلة ملهاش لازمه .. مكنتش عايزة يترشح بيحرق نفسه بطريقة بشعه

zeyseeker يقول...

@ طــارق

فــاكر إن كان له محاولات فاشلة فى المسلسلات ...

و أفتكرت له أغنية ... "محــتــار أختار مين فيهم ..هما الاتنين عاجبنى" ..كــانت مستفزة جدأً بصــراحة ! :))

التواصل الانسانى يقول...

خالد على عمر، 40 عامًا، والحائز على جائزة المحارب المصرى ضد الفساد لعام 2011، بعد حصوله على حكم قضائى بإلزام الحكومة بصرف معاش استثنائى لمصابى الثورة، وهو أحد مؤسسى جبهة الدفاع عن متظاهرى مصر، التى كانت ولا تزال تقدم الدعم القانونى للمحتجين السلميين منذ 2008 وحتى الآن.https://www.facebook.com/groups/291723127560556/292791560787046/
...............
https://www.facebook.com/KhalidAlypresidentialcampaign?ref=ts&sk=app_106878476015645

صحة أون لاين يقول...

ههههههههههههههه.. موضوع رائع ..

elbirtus يقول...

i always learn arabic language. this post was great, i don't know may be you can post it in bilingual

بنت القمر يقول...

الثورة مستمرة صفصفت علي ابو العز العريري والوسط علي عصام سلطان والوفد علي جورجيت ملاك.. والكتلة في رايي علي باسم بتاع المصري الديموقراطي والاخوان تلاتة اربعه كويسين والسلفيين كذلك... الفرق فرق خبرة لانهم كلهم جداد لا تقلق كلنا بنتعلم يا عزيزي

hussin_m10 يقول...

هوا مين خالد على المغنى دة؟؟ انا معرفش غير خالد على المترشح للرئاسة:D