2007/06/08

أومليت - ضان

لما تكون في الشارع و تروح لكشك سجاير عشان تفك فلوس يقولك مفيش فكة و هو معندوش أكتر من الفكة و تسأل سواقين التاكسي و تلاقي نفس الإجابة يبقى ده إسمة أومليتضان
لما واحدة بنت تكون مصاحبة واحد و بتخرج مع واحد تاني و بعد يومين تتخطب لواحد تالت و تعيش في دور خضرا الشريفة لما صاحبها يكلمها يبقى ده إسمه أومليتضان
لما تكون مستعجل و مفيش تاكسي فاضي راضي يقفلك عشان المكان إل إنته رايحة زحمة و هوه بروح أمه مابيحبش الزحمة يبقى ده إسمه أومليتضان
لما كل واحد دمة تقيل و مابيعرفش يرسم يعمل نكتة في الجرنال يبقى ده إسمه أومليتضان
لما واحد يلبس عباية فوق البدلة عشان يبقى إسمه كاتب إسلامي و يكفر كل من حولة يبقى ده إسمه أومليتضان
لما الميكروباص يركن في أي مكان في وسط الشارع منغير مايدي حتى إشارة و لما تلاقي ست ماشية تتمختر في الشارع و ساحبة طابور عيال بكل برود منغير ما تبص يبقى ده إسمه أومليتضان
لما سعادتك تقرا البوست ده و ماتسبش تعليق يبقى ده إسمه أومليتضان (1)

(1) دعابة أومليتضان مش أكتر

هناك 10 تعليقات:

Bella يقول...

ازيك ياطارق

والله الحاجات اللى تنقط كتيرة بس نقول ايه

يعني عندك لما تركب تاكسي والسواق يقعد يسمعك قصة ولا ثلاثية نجيب محفوظ عن امه المريضة ولا ابوه اللى في النعاش او ابنه اللى عايز نقل كلية ولما تيجي تدفع له الاجرى بكل بجاحة ماتعجبوش رغم انك متفق معاه من الاول ع المبلغ ده ويبص لك بسماجة ويقول لك امال نابح قلبي وباحكي في ايه من الصبح.

بابقى نفسي اغلس عليه واقول له هو مش الحكايات تبع التوصيلة برضه

ههههههههههه

الحاجات التي تغيظ كتيرة والمرارة مفقوعة وبافكر اركب مرارة كاوتش بدالها

تعرفش مستورد مرارات كاوتش ينوبك ثواب

Tarek يقول...

معاكي حق فعلا
الحاجات التي تغيظ كتيرة

IRC President يقول...

أومليت - ضان فعلا

GlimmerMan يقول...

أفهم بس .. جيبت "أوملتضان" دي منين ..
إلحق سجل حق إختراع .. بكرة تلاقيها دايرة في البلد كلها.

تحياتي

Tarek يقول...

عشان الناس بتوع مدونات بلا بذائات ميزعلوش مننا
و لو على حقوق الملكية الفكرية ماتخافش ممكن تستعملها براحتك بس تدفع 20 جنيه في السنة

shaimaa يقول...

لا مش حلو اومليت - ضان
مشيها عناب- سان
:-ppp

layal يقول...

ولو اني ما فهمت معني اولميت ضاني
واتوقع معناها
اومليت وضان يعني نوع من اللحمه
بس حبيت مكونش من الامليتضويين

غير معرف يقول...

السلامك عليكو
فتحت الموقع مصادفة ، واحلى مصادفة
وانا مع الاستاذ نستورد المرارات البلاستيكية من الصين ، بس ياريت حد يوصفلنا مكتب شحن من الصين ابن حلال يشحن لنا 60 مليون مرارة كاوتش (اعتقد كفاية عشان نعطي فرصة ل 10 مليون الباقيين ان يفقعوا لنا مرارتنا برحاتهم
وسلم لي على عمر افندي

تحياتي ام على من الكويت

غير معرف يقول...

أسلوب غير لائق للتدوين

elkomy يقول...

لما تكون بتحفر فى بير و كل حاجة تمام و فجأة تاخد flow يبقى ده أسمه أومتيت-ضان