ساعتي و أنا حر فيها

ساعتي و أنا حر فيها ... أأخرها، أقدمها، أو حتى أرميها.
تقريبا كل الناس إل أعرفهم مش بيحبوا حوار تغيير الساعة و التوقيت الصيفي و العك ده.
وتقريبا محدش بياخد رأينا في أي حاجة أبدا في البلد ديه، كل القرارات و القوانين و حتى إنتخابات نقابة البوابين بتبقى غصب عنا، بس ما علينا سيبنا من السياسة، تولع السياسة أصلا و أنا ماليش فيها و مابحبهاش، ليه بقى حاجة هابلة زي تغيير الساعة ديه كمان مش عارفين ناخد قرارنا فيها بنفسنا.
إيه إل حايحصل لو الناس كلها قررت إنها بعد رمضان مش حاترجع للتوقيت الصيفي تاني.

أولا، ماحدش ليه عندنا حاجة، ديه ساعاتنا و إحنا أحرار فيها.
ثانيا، لو كل الناس عملت كده الدنيا حاتمشي عادي و مش بعيد بعد كده يبقى فيه توقيتين في البلد، توقيت الشعب و توقيت الحكومة. ده حتى الحكومة ممكن ترضخ لتوقيت الشعب لو الناس كلها مشيت عليه و هي بقت بتصيف لوحدها.
ثالثا، الفترة بعد رمضان لحد ما يرجع التوقيت الشتوي فترة ضغيرة، فالتجربة مش حاتستمر كتير و اللخبطة حاتبقى محدودة، و أهو أدينا بنجرب و نشوف إيه إل حايحصل.
رابعا، أتحداك لو جبتلي حد أجنبي فاهم توقيت مصر ماشي إزاي، و حيث إن العالم قرية صغيرة ففكرة التوقيت بتاعنا ساعة تروح و ساعة تيجي و ساعة رمضان في الصيف و ساعة العيد في الشتا بتلخبطهم و تلخبطنا معاهم و تلخبط الجن الأزرق كمان، فأكيد التخلص من العك ده في مصلحة كل الشركات المتعددة الجنسيات و الشركات إل ليها تعاملات مع باقي خلق الله و أي حد عاقل في البلد ديه.
خامسا، إدينا بنروّش و نسلي وقتنا و أهي حجة لأي حد لو في يوم راح شغله متأخر يبقي يلبسها فينا و يطلع هو منها.