ميتسوبيشي الإسلامي

أكيد حتفتكروني بألف أي عنوان ملفت و خلاص ... لكن ده فعلا إعلان كان في التلفزيون من شوية و هو عبارة عن تليفون عادي لكن واضح إنه معمول مخصوص للدول الإسلامية و في منبه في أوقات الصلاة و مش بعيد يكون فيه صوت الأذان أو شوية تواشييح كمان
المهم في الموضوع إسم التليفون ... فميتسوبيشي عشان إسم عربية ياباني مشهورة و حايخليك تحس إنه تليفون جامد و ممكن يكون التليفون صيني لكن ميتسوبيشي ديه لزوم الدعاية. أما كلمة الإسلامي فهي لزوم عقدة الذنب إل حتحس بيها لو ماشتريتهوش ... فإنت بكده تبقي كافر و منحل و معندكش دين عشان المؤذن في الشارع صوته واطي و التلفزيون و الراديو مش كفاية عشان تعرف معاد الصلاة و ما ينقصك فعلا هو التليفون الإسلامي!