2007/08/09

تاج الجزيرة و سلطانية المبلوجين

ليه كل ما واحد يجيله تاج في مدونته
يحط صورة تاج و يسمي المقالة تاج الجزيرة
يعني فيه واحد زمان عمل الدعابة المرحة ديه
بس مش لازم كل واحد يكررها
العملية بيئت أوي

ليه المدونين اليومين دول بأوا
يا إما مدونين متأسلمين
يا إما مدونين بيسبوا الدين
أمال فين الناس الطبيعيين
العملية بهوئت أوي

ليه عندي إحساس إن المجتمع التدويني المصري بأى ممل
المواضيع بقت مكررة و مملة
والتفاعل بين الناس و بعضها بأى أى كلام
هوه إيه إل حصل للناس بالظبط
العملية بض ... أومليتضان ... أوي

ليه البنات المدونين بأوا أجرأ من الولاد في مناقشة المواضيع الخاصة بالجنس
و رغم كدة المجتمع بيقول إن الولاد عينهم يندب فيها رصاصة لكن البنات قطط مغمضة
يمكن عشان في الحياة الحقيقية الولد بيتكلم براحتة أما البنت فبترسم الدور
عشان كده البنات مش بيلاقو متنفس غير في المدونات خصوصا لو بيكتبوا بأسامي مستعارة
عموما العملية بذئت أوي

ليه مش بأهتم بالمواضيع السياسية
والأخبار مبئتش بتفرق معايا
وإل يحصل يحصل
يكش تولع
يمكن عشان العملية باظت أوي

ليه أنا باكتب باللغة العامية
رغم إني باحب أكتب بالفصحى أكتر
يمكن تغيير و محاولة لكسر القوالب التقليدية
يمكن محاولة لتأليد إخواننا اللبنانية
بس في البوست ده العملية بظرطت أوي

هناك 6 تعليقات:

themyth يقول...

بس هناك فكر تدوين فى المجتمع المصري
ديكتاتوري للاسف بالرغم انهم يريدون الحرية و الخ
و لكن عندما يرون مدون يكتب فى اى شىء او حت هلس يهاجمونة و يقولة له من انت لتكتب فى هذا الموضوع الامر غريب حقا
ان تقول رائيك فى موضوع سياسي حتى لو مشتركتش فى مظهرة احنا الشعب فينا صفات الفرعون اذا كنت تريد تغير يجب ان تغير من الجزور لكى يكون هناك مشاركة فعالة
www.lifennile.blogspt.com
just4peac@hot

Qwaider قويدر يقول...

الحال من بعضه في المدونات الاردنية

sigo يقول...

علي فكرة انا معاك مليون المية
بس علي فكرة بيتعيقلي كدة ان السبب الاساسي ان التدوين دلوقتي بقي موضة اكتر منة هدف
يعني انا اشوف النهاردة ان التدوين حلو والناس بتتابعة ومهتمة بية يطلع في دماغي تاني يوم اني اعمل مدونة وخلاص وهيا العملية اية غير شوية بحث في المنتديات التانية والنقل منها بعد تغير اسلوب الكتابة وهكذا دا غير ان الي غير اتجاهاتة علشان نفس السبب
يعني دا رايي والله اعلم

Lasto-adri *Blue* يقول...

مش مع الدكتاتورية اللى بيتكلم عنها المعلق الأول
انما اعتقد جايز يكون ثقافة بتفرض نفسها.. واظنها قادمة من المنتديات
عشان لاحظ كدة الاسماء.ز ح تلاقى اسماء على غرار الجناح المكسور والقلب الولهان والعاشق المتيم.. واغلبهم من لااسم صراحة بقلب.. بيبقى كلام منتديات بجد.. بس هنا من غير رقابة فقط

بخصوص المتأسلمين وغيرهم.. فهى الموجة العامة.. وكل فريق بيحاول يستفيد كل الوسائل اللى قدامه

اما تاج الجزيرة وبتاع.. فاصلا التاجات بقت غريبة قوى اليومين دول.. وحتى اسئلة عنصرية
:D

blanila يقول...

لسة دلوقتى كنت بفكر فى موضوع التاجات دى.
أنا عندى مدونة خايبة كدة لكن مدمنة قراية مدونات و الحقيقة بقى جسمى يقشعر لما أشوف البتاع دة اللى اسمه تاج. و الأسئلة التالية تطرح نفسها

مين اللى سماه تاج و ليه

و مين اللى بيخترع الأسئلة السخيفة اللى بتفضل تنتشر زى الجرب بين مجموعة مش بتستحمى

و ليه لازم اللى يجيله البتاع المقرف دة لازم يقرف بيه غيره

و ليه لازم اللى يجى له الأخ تاج دة يعمل نفسه محرج إنه جاله و برضه يرد. نفسى أشوف واحد يقول أنا مش رادد

فعلا العملية بيئت أوى

layal يقول...

كنت حسألك نفس السؤال اللي سألتوا في الاخر
كتبت بالعاميه ليه
صعبه المسأله علينا في فهم بعض المفردات
علي العموم هي الحالات المزاجيه لو ضربت ضربت
تحياتي